தலைவரின் அரசியல் சர்ச்சை | என் முதல் முழு நீளப் பதிவு

தலைவர் தனது அரசியல் வருகையை பற்றி 2017 ல் அறிவித்ததிலிருந்து பிற பதிவுகளை பகிர்ந்திருக்கிறேனே தவிர எனது கருத்துகளை நான் பதிவிட்டதில்லை. ஏனென்றால் ரஜினி ரசிகர்கள் இரு விதம். ஒரு சாரார் அவர் தன்னை அரசியலில் ஈடுபடுத்திக்கொண்டு மக்களுக்கு நல்லது செய்ய வேண்டும் என விரும்புவர்கள். மற்றொரு சாரார் அரசியல் வருகை மகிழ்ச்சியை அளித்தாலும் அவரது உடல் ஆரோக்கியத்தை முதன்மையாய் கருதுபவர்கள். இதில் நான் இரண்டாவது ரகம் என்பதாலேயே பதிவிடல் எதுவும் செய்யவில்லை. 

Source: The News Minute

சமீபத்தில் தலைவரின் பெயரில் ஒரு போலி அறிக்கை சமூக வலைதளங்களில் உலாவியது. அதில் தனது உடல்நிலை சரி இல்லை எனவும் அதனால் தான் அரசியல் வருகை குறித்த நிலைப்பாட்டை மறுபரிசீலனை செய்யப்போவதாகவும் குறிப்பிடப்பட்டிருந்தது. அதற்கு விளக்கம் தரும் பதிவாக தலைவர் கூறியிருந்தது அந்த அறிக்கை தான் வெளியிடவில்லை என்றும் ஆனால் அதில் தனது உடல்நிலை பற்றி குறிப்பிடப்பட்டிருந்த தகவல் உண்மை என்பதாகும். இந்த அறிக்கை வந்த சில வினாடிகளிலிருந்தே ஊடகங்கள் தங்களது ‘வழக்கமான' யூக வியூகங்களை வகுக்க ஆரம்பித்துவிட்டனர்.

Source: Twitter

பொதுவாகவே எனது தோரனையை கண்டு என்னிடம் அவ்வளவு எளிதில் எவரும் நெருங்க மாட்டார்கள். எந்த அளவுக்கு சகஜமாக பழகுகிறேனோ அந்த அளவுக்கு சிறு தவறு என்றாலும் சுருக்கென்று கோபம் கொள்ளும் குணம் என்பதால் சற்று ஜாக்கிரதையாகவே அணுகுவர். ஆனால் சிறு வயதிலிருந்து இன்று வரை என்னை சீண்ட நினைப்பவகர்கள் உபயோகபடுத்தும் ஆயுதம் தலைவர் தான். தலைவரை பற்றிய வீண் அவதூறுகளை பொறுத்துக்கொள்ளவே இயலாது என்னால். சிறு வயதில் பக்குவம் இல்லாத நிலையில் பிறரை கை ஓங்கும் அளவுக்கு கோபம் வரவைப்பது தலைவர் பற்றிய சீண்டல்கள் தான்.

இப்பொழுதும் தலைவர் அரசியலுக்கு வரப்போவதில்லை எனும் ஊடகங்களின் யூகங்களை கண்டு சிலர் என்னிடம் நக்கலாக கேள்வி எழுப்புகின்றனர். ஆனால் இப்பொழுது எந்த விமர்சனங்களை எப்படி எதிர் கொள்ள வேண்டும் என்ற வித்தை நன்றாகவே கைவருகிறது. இப்பொழுதும் நான் அழுத்தமாக பதிவு செய்வது என்பது என்னவென்றால் அரசியலா உடல் ஆரோக்கியமா என்று வந்தால் மறு நொடி யோசிக்காமல் நிச்சயம் தலைவரின் ஆரோக்கியத்தையே நான் தேர்ந்தேடுப்பேன். ஏனென்றால் ரஜினிகாந்த் என்ற நடிகருக்கு மட்டுமல்ல அவருள் இருக்கும் பக்குவப்பட்ட மனிதருக்கும் ரசிகை நான். பல விதங்களில் அவரை பின்பற்றவும் முயல்கிறேன்.

Source: Hindustan times

கேள்வி கேட்பவர்களுக்கும் சீண்ட நினைப்பவர்களுக்கும் எனது பதில். அவரை பற்றிய முதல் விமர்சனம் 1996ல் இருந்து அரசியலுக்கு வருகிறேன் என்று கூறி ஊரை ஏமாற்றி தனது படங்களை வெற்றி பெற செய்கிறார் என்று. ஒன்றை அவர்கள் மறந்து விட்டார்கள் ரஜினி என்ற நடிகருக்கு தமிழ்நாட்டில் மட்டுமல்ல இந்திய அளவிலும் உலக அளவிலும் ரசிகர்கள் உள்ளனர். அவரது அரசியல் வருகை தமிழகத்தில் தான் எனும்போது அது எவ்வாறு உலக அளவில் வசூலை ஈட்டித்தர முடியும். அதையும் மீறி 25 வருடங்களுக்கு மேலாக ஒரு மனிதர் பெருவாரியான தமிழர்களை ஏமாற்றி வருகிறார் என்று வைத்துக்கொண்டால் தவறு மக்கள் மீதாக தான் இருக்க முடியும். இதில் அவரை விமர்சிப்பவர்களும் அடங்குவர் ஏனென்றால் அவரது படங்களை பார்க்காதவர்கள் மிக மிக குறைவு.

Source: Facebook

அவரது நேரடி அறிவிப்பு 2017ஆம் ஆண்டில் தான் வந்ததே தவிர அதற்கு முன்னால் அப்படி ஒரு அறிவிப்பை அவர் அளித்ததே இல்லை. அவரது அரசியல் வருகையை பெரிதாக விரும்பாத நீங்கள் ஏன் அதற்கு ஆதரவு அளித்தீர்கள் என்று கேட்கிறார்கள். குருட்டுத்தனமாக எந்த ஆதரவையும் நான் அளிக்க வில்லை. அரசியல் வருகையை பற்றி அவர் முன்வைத்தது மக்களுக்கு ஏதாவது நல்லது செய்ய வேண்டும் என்பது தான். அதற்கு அவர் முன்வைத்தது ஆன்மீக அரசியல். ஆன்மீகம் என்றாலே அதை இந்துக்களோடு இணைத்து கூறுவது பிற நம்பிக்கைகளை கொச்சைப்படுத்தும் செயலாகும். அதை விட ஆன்மீகத்தை மதத்தோடு இணைத்து கூறுவதே தவறான ஒரு புரிதலாகும். ஆன்மிகம் என்பது சக ஆன்மாக்களை மதித்து எவ்வித வெறுப்பும் இல்லாமல் ஒற்றுமையை போற்றி ஒன்றாக வளம் பெறுவதே ஆகும். 

Source: The Indian Express

இந்த கருத்தினால் தான் தன்னை விமர்சிப்பவர்களையும் விமர்சிக்காத குணம் கொண்டிருக்கிறார் ரஜினி. அவர் மீது என்ன குற்றச்சாட்டு வைக்கப்படுகிறது என்று பார்த்தால் அவர் தமிழரல்ல அதனால் தமிழக அரசியலுக்கு அவர் வரக்கூடாது என்பது தான். அடுத்த குற்றச்சாட்டு அவர் நடிகர் அதனால் அவர் அரசியலுக்கு வரக்கூடாது என்பதாகும். இவ்விரு விமர்சனங்களை கண்டால் நகைக்கத்தான் தோனுகிறதே தவிர விளக்கம் கொடுக்கும் அளவுக்கு தகுதியற்றவை இவை. அதற்கும் ஒரு முற்றுப்புள்ளி வைத்தார் தலைவர் , தான் முதல்வர் பதவியில் அமர மாட்டேன் என்று. விமர்சித்தவர்கள் பலரே பாராட்டவும் செய்தனர்.

Source: Twitter

சரி , தனது அரசியல் வருகை அறிவித்த தினத்திலிருந்து இன்று வரை இவரது இயக்கம் என்ன செய்தது என்று பார்த்தால் பிற கட்சிகள் போல் உண்டியல் குலுக்கி கட்சி நிதி திரட்டவில்லை, தேவையற்ற படாடோபங்கள் செய்யவில்லை. மாறாக கஜா புயலிலிருந்து கொரோனா நிவாரண பணி வரை தமிழகத்தில் பல்வேறு நலப்பணித் திட்டங்களை செயலாற்றி வருகிறார்கள். ஊடங்கங்கள் இதை பெரிதாக மக்களிடம் எடுத்து செல்லவில்லை என்பதே உண்மையாகும். இவ்வளவும் நடந்த பிறகு இப்பொழுது தனது அரசியல் நிலைப்பாட்டை ரஜினி மாற்றிக்கொண்டால் அது ரஜினி ரசிகர்களை ஏமாற்றும் செயல் என்று கூறுகிறார்கள். அரசியல் ஆதாயம் தேடுபவர்கள் மட்டுமே எமாற்றமடைவார்களே தவிர உண்மையான ரசிகர்கள் தலைவரின் எந்த முடிவையும் வரவேற்கவே செய்வார்கள்.

Source: Rediff

இன்றும் தான் அரசியலை விட்டு விலகுவதாக தலைவர் அறிவிக்கவில்லை. யூகத்தின் அடிப்படையில் அவர் விலகுவதாக வைத்துக்கொண்டாலும் தனியொரு ரசிகையாக எனக்கு தோன்றுவதை பகிர விரும்புகிறேன். நான் குடிமைப்பணிக்களுக்கான தேர்வை எதிர்கொள்ள சென்னை வந்த புதிதில் எனது தந்தை எனக்கு கூறிய ஒன்று என் நினைவிற்கு வருகிறது. நீ உயர்ந்த பதவிக்கு தான் செல்ல வேண்டும் என்று நான் நினைக்கவில்லை ஆனால் சமூகத்திற்கு எதாவது நல்லது செய்ய வேண்டும் என்ற உனது எண்ணமும் அதற்கு நீ தேர்ந்தெடுத்திருக்கும் முறையும் உயர்ந்தவையாக இருக்கும் ஒரே காரணத்திற்காக தான் நான் உன்னை ஆதரிக்கிறேன். மற்றப்படி ஒரு தந்தையாக நான் விரும்புவதெல்லாம் என்றும் நீ மகிழ்ச்சியாகவும் செய்ய நினைப்பதை எவ்வித தடையுமின்றி செய்து முடிக்கும் திறனும் வசதியும் பெற்றிருக்க வேண்டும் என்பதே ஆகும் என்றார்.

Source: Hindustan times

என்னால் எனது இலட்சியத்தை அடையமுடியவில்லை. ஆனால் இன்றும் சமூகத்திற்கு பயனுள்ளதாக எதாவது செய்ய வேண்டும் என்ற எண்ணம் மாறவில்லை. சந்தர்ப்பம் கிடைத்தால் நிச்சயம் செய்வேன். இதே தான் தலைவருக்கும் நான் நினைக்கும் கருத்து. அவர் அரசியலுக்கு வருகிறாரோ இல்லையோ, மக்களுக்கு நல்லது செய்ய வேண்டும் என்ற அவரது எண்ணத்தை நான் நிச்சயம் வரவேற்கிறேன். அதற்காக அவர் உயிரை பணயம் வைத்து அவர் எதுவும் செய்ய தேவையில்லை. ஒரு நல்ல நடிகராகவும் மனிதராகவும் அவர் நிறையவே செய்துவிட்டார். அவர் அப்படியொன்றும் பெரிதாக செய்துவிடவில்லை என விமர்சிப்பவர்களுக்கு பதில் அவர் நல்லது செய்யவில்லை என்றே வைத்துக்கொள்வோம் அதே நேரத்தில் ஊரை அடித்து உலையில் போடவும் இல்லை என்பதும் நூறு சதவீதம் உண்மையே.

Source: Mint

இனி தலைவர் அரசியலுக்கு வந்தாலும் வராவிட்டாலும் என்றும் அவரது அபிமானியாக நான் இருப்பேன். அப்படி அரசியலுக்கு வந்தால் குருட்டுத்தனமாக ஒட்டு போட மாட்டேன். நிச்சயம் அவரது கொள்கைகளை பரிசீலித்த பின்னர் அவை ஏற்புடையதாக இருப்பின் எனது ஆதரவை அளிப்பேன். ஏனென்றால் நாட்டு நலனா தலைவரா என்று வந்தால் சிறிதும் தயக்கமில்லாமல் நாட்டு நலனையே தேர்ந்தேடுப்பேன். தலைவரின் அரசியல் வருகை பற்றிய கேள்விகளுக்கும் விமர்சனங்களுக்கும் சீண்டல்களுக்கும் என்றும் எனது பதில் இதுவே.